Ég á við vandamál að stríða sem ég bara skil alls ekki. Ég nota gleraugu. Það er ekki vandamálið. En síðustu tvo daga hefur sólin skinið á andlit mitt í garðavinnunni og ég er komin með gleraugnafar. En ég var með linsur báða dagana. Nefið mitt er ansi rautt og kinnarnar líka, en svo er bilið á milli augnanna skjannahvítt. Þetta gerist eiginlega alltaf. Nefið verður rautt en restin hvít. Ætli húðin sé búin að venjast þunga gleraugnanna svona vel að hún er hætt að taka við sólargeislunum? Ég vona ekki því ég ætla sko ekki að koma heim með gleraugnafar frá Tyrklandi í ágúst. Kannast einhver við þetta vandamál?

Brasilía er að rústa Japan í fótbolta. Ég sem hélt með Japan. Ég þoli ekki þegar sama liðið vinnur aftur og aftur.

Kveðja, Edda.

Ég veit að Hróarskeldubandið er stílbrot við ýmis tækifæri en ég held ég láti það bara detta sjálft af með tímanum. Ég hef ekki taugar í að taka það af. Æj, þetta er svo sem bara lítill efnisbútur, en hann geymir góðar minningar. Svo er ég líka búin að kaupa mér appelsínugulan kjól sem passar svona líka vel við appelsínugula bandið.

Þrátt fyrir að ég og Laufey séum að vinna subbulega slátturvinnu erum við duglegar að halda veislu í hádegishléunum og erum nú búnar að fara þrisvar á Kaffitár í hádeginu. Það er ótrúlega gott að hafa uppáhaldskaffihúsið sitt bara hér í Þjóðminjasafninu svona rétt hjá. Það brýtur vinnudaginn líka upp að fara og fá sér góðan kaffibolla í hádeginu og koma svo kannski við í Bóksölu Stúdenta og skoða fallegar bækur og ritföng.

Gærkvöldið var mjög huggulegt. Ég fór út að borða á Krua thai með nokkrum stúlkum og eftir góðan og of mikinn mat fórum við í nýja setrið hennar Sigrúnar sem er rosa huggulegt og sameinuðumst fleiri stúlkum. Þar drukkum við te og borðuðum Toblerone og spjölluðum um heima og geima. Ég skemmti mér mjög vel og tók nokkrar sætar myndir sem ég er búin að setja á internetið á myndasíðuna mína. Kíkið á þær. Sérstaklega held ég upp á krúttlegu hópmyndirnar.

Eigið huggulegt sumar.

Edda.