Súri dagur. Ling ping pong og Shang Kang Kong. Og líka Mulan. Kína er gott ríki. Með forseta, en ekki keisara. Ég þakka Arngunni fyrir skemmtilegan fyrirlestur um Kína. Þá þakka ég sjálfri mér fyrir að hafa velst um á borðinu mínu í skólanum og þulið upp kínverskt þykjustunöfn. Það veitti mér kátínu. Systir mín fær þökk fyrir að hafa sett lagið Sexy love með Ne-yo inn á
I-tunes tölvunnar minnar. Klárlega frábært lag. Ég gæti horft á Breakfast at Tiffany's sem amma lánaði mér eða The O.C. síðan í gær sem ég missti af en ég held að það væri líka gott að lesa fáeinar línur í Hinu ljósa mani.

Mbl.is er upphafssíðan mín á internetinu því mér dettur ekkert sniðugra í hug en nú held ég að ég neyðist til að skipta. Það er alltaf einhver viðbjóðsleg auglýsing blikkandi framan í mig með fótsveppum og ógeðslegum kartnöglum. Ég skil ekki. Hvað græðir þetta fyrirtæki á að hafa svona viðbjóðslegar myndir í auglýsingum sínum? Fólk nýtir sér þjónustu þessa fyrirtækis til að losna við þetta ógeð. Það er ekki ætlast til þess að verið sé að flagga þessum sveppum og viðbjóði bara um allan veraldarvefinn. Mér allavega finnst þetta ömurleg auglýsing.

Vonandi heldur þessi dagur áfram að vera svona skemmtilega súr.
Lifi Kína. Og Mateus.
Kv. Edda.

Þá er síðustu árshátíð minni í MR lokið og skemmti ég mér rosa vel. Langt síðan að mér hefur fundist gaman á balli eða yfir höfuð nennt að fara. Allt varðandi daginn var vel heppnað. Morgunpartýið, maturinn með kennurunum (þeim sem sáu sér fært að mæta!), partýið og svo ballið sjálft. Ég hlakka til að sjá myndir hjá þeim sem tóku, ég hvet alla til að setja þær inn á netið. Það væri gaman að sjá.

Um daginn fóru ég og Laufey á Perfume í bíó. Mér fannst hún góð. Hún var spúkí og spennandi og mjög flott. Kannski einum of löng, en samt ekkert þannig að hún varð leiðinleg. Svo horfði ég líka á De grönne slægtere í vikunni í annað sinn. Hún er frábær. Ég hvet alla til að horfa á hana.

Hafið það nú gott um helgina, Edda.

Ég þrái eitthvað skemmtilegt og spennandi. Mig langar í gott partý eða góða stund með vinum mínum. Ég fæ sittlítið af hvoru á fimmtudaginn þegar ég fer á mína síðustu árshátíð í MR. Eftir það mun ég væntanlega bara fara á einhverjar nördalegar árshátíðir í Háskólum. Einu sinni fannst mér fólk í háskóla vera nördalegasta fólk sem ég vissi um. Það var enginn sætur þar, bara nördar með bakpoka. Bráðum mun ég kannski tilheyra þessu fólki. En mér finnst þau ekkert lengur vera nördar, bara sumir, útvaldir.

Mig langar líka dálítið að eignast mína eigin íbúð. Aðallega svo ég geti innréttað hana og gert voða fína. Og líka til að ég geti haldið danskvöld einu sinni í viku þar sem ég verð búin að ýta öllu í stofunni til og svo set ég á góða tónlist og vinir mínir koma og dansa og hoppa og sprella.

Ég hlakka svo til fyrsta júní!

Bless bless, vinir mínir og óvinir, Edda.

Myndin er eftir belgíska listamanninn Réné Magritte.